Վատիկանի Ուխտագնացութեան կազմակերպութեան տնօրէնի այցը

Վատիկանի Ուխտագնացութեան կազմակերպութեան տնօրէն՝ Եպիսկոպոս Մոնսինեոր Անդրէ Աթան չորսհոգանոց մի պատւիրակութիւն գլխաւորելով եւ Թեհրանի Մշակութային ժառանգութեան կազմակերպութեան հանրութեան հետ կապի բաժնի մի խումբ աշխատակիցների ընկերակցութեամբ երկուշաբթի փետրւարի 1-ին այցելեց Թեհրանի Ս. Մարիամ Աստւածածին եկեղեցին ու դրա շրջափակում գտնւող «Արտակ Մանուկեան» թանգարանը:

Վատիկանի Ուխտագնացութեան կազմակերպութեան տնօրէնը նախօրէին ունեցած հարցազրոյցի ժամանակ ընդգծել էր, որ Իրանի ու Իտալիայի յարաբերութիւնները մտել են նոր փուլ եւ երկու ժողովուրդների միջեւ երկխօսութեան հնարաւորութիւն է ստեղծւել: 

Վատիկանի Ուխտագնացութեան կազմակերպութեան տնօրէնի այցին առընթեր, Թեհրան նահանգի Մշակութային ժառանգութեան, ձեռարւեստի ու զբօսաշրջութեան գերատեսուչ՝ Ռաջաբալի Խոսրոաբադին մատնանշելով այն կէտը, որ ԻԻՀ-ի համակարգի կապակցութեամբ Վատիկանի ներկայացուցիչների տեսակէտներում առաջացած փոփոխութիւնը կարող է աշխարհի կաթոլիկներին խրախուսել Իրան այցելելու ուղղութեամբ, ասաց. «Թեհրանի պատմա-մշակութային գրաւչութիւնների մասին Վատիկանի ներկայացուցիչների եւ ընկերակցող պատւիրակութեան տեսակէտների արտացոլումն անկասկած պատճառ կարող է դառնալ, որ միաստւածային այս կրօնի հետեւորդներն առաւել հանգիստ մտքով Իրան ուղեւորւեն»: 

«Վատիկանի ներկայացուցիչների այցը Ս. Մարիամ Աստւածածին եկեղեցի, «Արտակ Մանուկեան» թանգարան եւ զրադաշտականների «Ադրիան»-ի մեհեանը նպատակ ունէր նրանց ծանօթացնել իսլամական Իրանում միաստւածային կրօնների հետեւորդների կրօնական աշխատանքներին»,-ասաց Խոսրոաբադին: