Շաբաթ, սեպտեմբերի 29-ի առաւօտեան, սրբազան պաշտպանութեան շաբաթւայ առիթով, Իրան-Իրաք պարտադրեալ պատերազմի տարիներին, իր կեանքը յանուն երկրի հողային ամբողջականութեան նւիրաբերած նահատակ Գագիկ Թումանեանի կիսանդրու բացումը կատարւեց, Թեհրանում նահատակի անունը կրող «Գագիկ Թումանեան» հրապարակում:
Շաբաթ առաւօտեան, Թեհրանի քաղաքապետարանի նախաձեռնութեամբ եւ քաղաքապետարանի 6-րդ շրջանի տնօրինութեամբ, Թեհրանի Ղաէմմաղամ Քարահանի պողոտայում գտնւող «Գագիկ Թումանեան» հրապարակում տեղադրւեց նահատակի կիսանդրին:
Հարկ է նշել, որ սոյն պողոտայում գտնւող նախկին «Շոա» հրապարակը սրանից երեք տարի առաջ անւանակոչւեց նահատակ Գագիկ Թումանեանի անւամբ:
Միջոցառումը մեկնարկեց Իրանի պետական հիմնով և Տէրունական աղօթքով։
Բացումը կատարեց Թեհրանի Հայ Դատի յանձնախմբի նախագահ՝ Իսիկ Իւնանէսեանը, որից յետոյ արտայայտւեց Թեհրանի քաղ խորհրդի մշակութային կոմիսիոնի նախագահ՝ Հաղշենասը, մեծարելով հայ նահատակների դերը։
Ապա նահատակի ընտանիքի անունից արտայայտւեց Անի Մանուկեանը:
Պետական պաշտօնեաներից ելոյթ ունեցաւ նաև՝ Թեհրանի 6-րդ շրջանի Քաղաքապետ՝ Մոհամմադռեզա Դէհդառիփուռը:
Թ.Հ.Թ. Թեմական Խորհրդի անունից արտայայտւեց նաև խորհրդի անդամ՝ պրն. Զորիկ Կարապետեանը:
Ներկայ էին՝ Կրօնական փոքրամասնութիւնների հարցով հանրապետութեան նախագահի խորհրդականի գրասենեակի պատասխանատուն, Թեհրանի Քաղխորհրդի, Թեհրանի քաղաքապետարանի ներկայացուցիչները, նահատակների հիմնարկի եւ զինւորական բարձրաստիճան հիւրեր, Արժ. Տ. Սահակ քհն. Խոսրովեանը, Թ. Հ. Թ. Թեմական խորհրդի Բ ատենապետ պրն. Վարուժ Էովհաննիսեանը, նահատակի մայրը, քոյրը, հարազատներն ու մեծ թւով հայրենակիցներ:
http://www.tehranprelacy.com/9-content-hy/news-hy/1978-2018093003?tmpl=component&print=1#sigProIda78a63f675