ԱՆԼԱՅՆ ՎՃԱՐՈՒՄ

Ծխական Տուրք

Մեր փոքր , բայց կարեւոր ներդրում է Ազգային-Համայնքային կառոյցների Պահպանման համար

Սիրելի ժողովուրդ, Թեհրանի հայոց Թեմական Խորհրդի որոշմամբ՝ Ծխական Տուրքի վճարումը Ձեզ համար դիւրացնելու նպատակով՝ այսուհետ կարող էք կատարել այս կայքի միջոցով, որով օգտակար կը հանդիսանաք թեմիս ազգային-համայնքային կառոյցների պահպանման գործին:

ԾԽԱԿԱՆ ՏՈՒՐՔԻ ԱՆԼԱՅՆ ՎՃԱՐՈՒՄ

Ս. Աստւածածնայ Տօնը Ռաշտ-Անզալիում

Ս. Աստւածածնայ Վերափոխման տօնն իր էութեամբ և խորհրդով խորը քրիստոնէական կրօնի վարդապետութիւն բովանդակելու պատճառով մեր եկեղեցու Սրբազան Հայրերի կողմից ներառւել է եկեղեցում հինգ մեծ (տաղաւար) տօների ցանկում:

Որպէս վարդապետութիւն սոյն տօնն իր մէջ խտացնում է մեռելների յարութեան, երկինք համբառնալու, յաւիտենական արքայութիւնը ժառանգելու և ըստ գործերի վարձատրւելու ամենակարևոր հոգևոր ճշմարտութիւնները, որ Քրիստոս իր երկրաւոր կեանքի, առաքելութեան և քարոզութիւնների միջոցով բացայայտեց ու փոխանցեց:

Այո՛, թէև վերափոխման տօնը անմիջականօրէն առընչւել է Ս. Կոյս Մարիամի անձին, նրա ննջման դրւագին և ապա մարմնով երկինք փոխադրւելուն, սակայն սոյն կատարւածը, որպէս աստւածային խոստում վերագրւում ու կապւում է իւրաքանչիւր ճշմարիտ քրիստոնեայ հաւատացեալին, ով իր կեանքը ապրում է համաձայն Աստծու կամքին, Աստւածաշնչին և աստւածային պատւիրաններին և յատկապէս իբրև անդամ Ս. Եկեղեցուն և Քրիստոսի խորհրդական մարմնին, ինչպէս նաև իբրև Ս. Կոյս Մարիամի հարազատ զաւակ, նրա կեանքին հետևելով, նրա նման իր կեանքը յատուկ առաքինութիւններով յատկանշելով, որոնցով մասնաւորւում էր Ս. Կոյսը:

Այս ուրախալի առիթով նախորդ տարիների նման, այս տարի ևս թւականիս 9 և 10 օգոստոսին, Թ.Հ.Թ. Կրօնական Խորհրդի կողմից, ուխտագնացութիւն կազմակերպւեց դէպի Ռաշտ-Անզալի:

Շուրջ 40 ուխտաւորներից բաղկացած հանրակառքը հինգշաբթի առաւօտ կանուխ ճանապարհւեց դէպի Ռաշտ: Սոյն ուխտագնացութեանը Թեմիս Առաջնորդ Գերշ. Տ. Սեպուհ Ս. Արք. Սարգսեանին ընկերակցում էին առաջնորդական փոխանորդ՝ Գերշ. Տ. Մակար եպս. Աշգարեանը, շրջանի այցելու հովիւ՝ Արժ. Տ. Սահակ քհնյ. Խոսրովեանը և հիւրաբար տիրամայր Սօնա Աշգարեանը:

Առաջնորդ Սրբազանը Ռաշտի մուտքին դիմաւորեց Ռաշտի և Անզալիի եկեղեցադպրոցական հոգաբարձութիւնների կողմից և ապա ուղղւեց դէպի եկեղեցի, ուր ուխտաւորների ներկայութեամբ կատարեց կանոնական աղօթքը և նրանց փոխանցեց իր հայրական պատգամը: Ապա դպրոցի սրահում տեղի ունեցաւ հիւրասիրութիւն: Ռաշտի եկեղեցադպրոցական հոգաբարձութեան անունից՝ Մաքսիմ Յովսէփեանը բարի գալուստ արտասանեց: Նա իր խօսքում շնորհաւորեց Առաջնորդ Սրբազան Հօր քահանայական ձեռնադրութեան և օծման 50-ամեակը, ինչպէս նաև Թեհրանի թեմի առաջնորդութեան 19-ամեակը: Նա անդրադարձաւ նաև տեղում կատարւած աշխատանքների, ինչպէս նաև դիմագրաւած դռւարութիւնների մասին:

Կէսօրւայ ճաշը դպրոցի սրահում միասնաբար կիսեցին, որի ընթացքին տեղի ունեցան բաժակաճառութիւն, խմբերգ, մեներգ և ասմունք: Աւարտին Սրբազան Հայրն իր հերթին գնահատեց Ռաշտի փոքրաթիւ համայնքը և յատկապէս եկեղեցադպրոցական հոգաբարձութեան անդամների անձնազոհ աշխատանքն ու ծառայութիւնը: Նա խօսեց ուխտագնացութեան կարևորութեան մասին, գնահատելով ուխտագնացութիւնը կազմակերպողների աշխատանքը և աւարտին անդրադարձաւ նաև սոյն տարին յատկանշող Հայաստանի առաջին հանրապետութեան հիմնադրութեան 100-ամեակին և դրանից փոխանցւող պատգամներին: Այդ առիթով, Սրբազան Հայրը եկեղեցադպրոցական հոգաբարձութեան և գրասենեակին նւիրեց 100-ամեակին նւիրւած՝ նոր հրատարակւած երկու հատոր գրքերից զոյգ օրինակներ:

Երեկոյեան ուխտաւորները մեկնեցին դէպի Անզալի:

Ուրբաթ առաւօտեան ժամը 10:30-ին Անզալիի Ս. Աստւածածին մատուռի մէջ մատուցւեց հանդիսաւոր եպիսկոպոսական պատարագ ձեռամբ թեմիս առաջնորդ Գերշ. Տ. Սեպուհ Ս. Արք. Սարգսեանի: Պատարագին Ս. Սեղանին սպասարկեց Արժ. Տ. Սահակ քհնյ. Խոսրովեանը, իսկ երգեցողութիւնը կատարեց ուխտագնացութեան յատուկ երգեցիկ խումբը ղեկավարութեամ տկն. Օֆիկ Մելիքեանին:

Սրբազան Հայրն իր քարոզում անդրադարձաւ Ս. Կոյս Մարիամի առաքինութեանց մասին և վեր բերեց նրա մայրութիւնը իբրև տիպար և բարձրագոյն օրինակ բոլոր մայրերին: Իր քարոզում անդրադարձաւ նաև վերափոխման կապւած ազգային աւանդութիւնների և ի մասնաւորի խաղողի օրհնութեան արարողութեանը և դրա տօնին առնչւելու իմաստին և կարգաւորմանը:

Պատարագի աւարտին տեղի ունեցաւ աւանդական խաղողօրքնէքը, որից յետոյ ուխտաւորները եկեղեցու բակում հիւրասիրւեցին և ապա ճշտւած ճաշարանում, որտեղ Անզալիի եկեղեցադպրոցական հոգաբարձութիւնը Առաջնորդ Սրբազան Հօրն ու իր ընկերակիցներին էր ճաշով հիւրասիրել, միասնաբար կէսօրւայ ճաշը կիսեցին: Ընթացքին դարձեալ ըստ սովորութեան տեղի ունեցաւ բաժակաճառութիւն, խանդավառ երգեցողութիւն և մաղթանքների փոխանակում: Երկու տեղում էլ, թէ Ռաշտում և թէ Անզալիում սեղանապետութիւնը վարեց պրն. Արման Բանդարին:

Ուրախ և խանդավառ մի պահ անցկացնելուց յետոյ ուխտաւորները երեկոյեան ժամը 5:00-ին վերադարձան Թեհրան: 

ԼԵԶՒԻ ԸՆՏՐՈՒԹԻՒՆ

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897980

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com