Լեզու | زبان

Search

Կապ մեզ հետ

خیابان استاد نجات الهی، شماره 295
تهران 1598873311

No.295, Ostad Nejatollahi Ave.,
Tehran - IRAN

Tel: (+98-21) 88901634, 88901635,
88901636, 88897980, 88897981

Fax: (+98-21) 88892617

info@tehranprelacy.com


Թ. Հ. Թեմի Յարաբերական Մարմնի հետ կապւելու համար՝
pr@tehranprelacy.com



Քահանայական ձեռնարդութեան եւ օծման 50-ամեայ Յոբելեանի եւ Թ.Հ.Թ. առաջնորդութեան 19-ամեակի նշում

Յոբելեանական նշումը թէեւ ըստ արտաքին տեսքին գեղեցիկ մի ընկերային սովորոյթ է, սակայն դրանից վեր եւ աւելին՝ նա իր մէջ կրում է դաստիարակչական բնոյթ եւ նկարագիր ունեցող մի հզօր շարժառիթ, որը եռեակ նպատակներ է հետապնդում։

Նախ վեր բերել, բացայայտել եւ մարդկանց յիշողութեան մէջ թարմացնել անձի արժէքը եւ նրա կատարած աշխատանքների, մատուցած ծառայութեան եւ յանձն առած զոհողութեան կշիռը, որպէսզի հանդիսատեսը հրաւիրւի ներկայացւածների լոյսի տակ դուրս գալու իր առողջ դատողականութիւնը անդամալուծող անգիտութեան, ինքնահաւանութեան եւ եսապաշտութեան նախապաշարումներից եւ սկսի արդարացիօրէն գնահատել իր կեանքում եւ աչքի առաջ ունեցած արժէքները։ Երկրորդ, ամեակների նշումը ըստ էութեան յոբելեարին իսկ մղում է աւելի երախտապարտ ու շնորհակալ լինել Աստծուն՝ հրաշքի համազօր իրագործումների ի տես՝ եւ շատ աւելի խորը պատասխանատւութեամբ գօտեպնդւելու՝ շարունակելու համար։ Եւ երրորդ, զգաստութեան է հրաւիրում հանդիսատեսին, որպէսզի անձնապէս ինքնաքննութեան եւ հաշւետւութեան ենթարկելով ինքն իրեն բացայայտի թէ իր կեանքի եւ ժամանակի առումով, ի՞նչ կերպ օգտագործած ու արժեւորած է դրանք եւ ի՞նչ նպատակի համար. ու բարձրագոյն աստիճանի գիտակցութեամբ, ինքնաճանաչողութեամբ եւ խղճի խորագոյն անկեղծութեամբ խոնարհւելու տւեալ արժէքին դիմաց եւ գնահատելու այն։

Թւականիս շաբաթ 7 յուլիսի երեկոյեան ժամը 8։00-ին Առաջնորդանիստ Ս. Սարգիս մայր եկեղեցում, տեղի ունեցաւ մի շատ գեղեցիկ եւ ուրոյն նախաձեռնութիւն, նւիրւած Թ.Հ.Թ. բազմերախտ առաջնորդ Գերշ. Տ. Սեպուհ Ս. Արք. Սարգսեանի քահանայական ձեռնադրութեան եւ էծման ոսկեայ 50-ամեայ յոբելեանին եւ թեմիս առաջնորդութեան 19-ամեակի զոյգ եւ բարեբաստիկ առիթներով։ Ծրագիրը կազմակերպւել էլ Թեմիս Կրօնական Խորհրդի կողմից համագործակցութեամբ՝ Թ.Հ.Թ. Քրիստոնէական Դաստիարակութեան Բաժանմունքին։

Եկեղեցին լցւել էր խուռներամ բազմութեամբ, հոգեւոր, քաղաքական, ազգային իշխանութեան եւ միութենական հանգամանաւոր ու պատւոյ հրաւիրեալներով եւ Թեմի զանազան քաղաքամասերից ու շրջակայ քաղաքներից ժամանած հաւատացեալ զաւակներով։

Ծրագիրն սկսւեց Յոբելեար Սրբազան Հօրը «Տէրունական» աղօթքի մատուցմամբ եւ ապա բացման խօսքով հանդէս եկաւ Կրօնական Խորհրդի անունից Արժ. Տ. Կոմիտաս քհնյ. Ղարախանեանը, որ իր խօսքում անդրադարձաւ թէ ամեակների նշման կարեւորութեանը եւ թէ գրքի ու նրա առնչւած բոլոր տարածքների յոյժ անհրաժեշտութեանը։ Նա ակնարկելուց յետոյ, թէ ինչպէս է ընթանալու օրւայ ծրագիրը, հրաւիրեց օրդ. Շարիս Մելքոմ Աբգարին, որպէսզի ներկայացնի Յոբելեար Սրբազան Հօրը ձօնւած՝ «Յովհանէս Առաքեալի երեք Ընդհանրական նամակները» խորագրող գիրքը, որը աշխատասիրել էր առաջնորդական փոխանորդ՝ Գերշ. Տ. Մակար Ս. եպս. Աշգարեանը։ Օրդ. Շարիսը իրեն յատուկ բանաստեղծական ոճով եւ տպաւորիչ առոգանութեամբ, արտայայտչաձեւով ու դիպուկ պատկերաւորութեամբ հեզասահ ընթացքով վեր բերեց գրքի առանձնայատկութիւնները, ընդհանուր կէտերի մէջ խօսելով ներկայ ժամանակում տիրող անհաւատութեամբ կուրացած, աղանդաւոր շարժումներով ողողւած եւ աստւածային ճշմարտութիւնից հեռու ապրող ընկերութեան մէջ նրա ունեցած յոյժ կարեւոր արժէքին ու դաստիարակիչ դերակատարութեանը մասին, ինչպէս նաեւ գրքում յիշւած առաքեալի նկարագրին զուգահեռ անդրադարձաւ ճշմարիտ հովւի եւ առաջնորդի կերպարին, ըստ արժանւոյն այն համաձայնեցնելով Յոբելեար Սրբազան Հօրը նկարագրին, կոչումին, առաքելութեանն ու կերպարին։

Գրքի ներկայացումից յետոյ տեղի ունեցաւ ձեռնարկի երկրորդ բաժինը, ընդ որում Մակար եպս. Աշգարեանը ներկայացրեց յոբելեար Սրբազան Հօրը քահանայական յիսնամեայ կեանքի, առաքելութեան, գործունէութեան ու վաստակի եւ 19-ամեայ առաջնորդութեան ամփոփ պատկերը։

Ներկայացումը իր մէջ ներառնում էր սրբազան Հօրը ծնուդից մինչեւ այդ պահը ապրած կեանքի ամենակարեւոր հանգրւաններն ու իրագործումները, որոնք այնքան գեղեցիկ եւ մտածւած կերպով համադրւած էին, ներդաշնակւած ու կարգաւորւած, որը խոր տպաւորութիւն թողեց ներկաների վրայ, որովհետեւ ըստ որակի ներկայացումը շատ իւրայատուկ էր։ Այն յագեցւած էր գեղարւեստական ներկայացումներով, ինչպէս՝ երգ, դաշնամուրի եւ ջութակի նւագակցութիւն եւ ասմունք։ Ներկայացումը մեծապէս տաւորիչ էր այն առումով նաեւ, որ ո՛չ մի դադար տեղի չունեցաւ, այլ կարկաչահոս աղիւրի նման հեզասահ ընթացքով սկսւեց ու աւարտւեց, մէջ ընդ մէջ ներկայացւած յոբելեար Սրբազան Հօրը նկարագրային ուրոյն յատկութիւններին առնչւած ու պատշաճեցւած երգերով, ասմունքներով ու նւագներով, ինչպէս նրա հայրութեան գաղափարը շեշտւած ժամանակ հնչեց «Հայր իմ մանկուց սիրել եմ քեզ»-ը կատարողութեամբ Տիկ. ՕՖիկ Մելիքեանի կողմից։


Նրա Հայրենակարօտութեան մասին անդրադարձի մասին հնչեց՝ «Կռունկը» ջութակի կատարողութեամբ Տիկ. Արմինէ Պատալեանի։ Նրա հայրենասիրութեան եւ հողի, սարի ու ջրի կապւածութեան մասին արձագանգւած ժամանակ, հնչեց «Ով Հայոց Սարեր»-ը մեկնաբանութեամբ Պրն. Նորիկ Ղարաբեկեանի։ Յոբելեար Սրբազան Հօրը ընդհանրապէս եկեղեցու եւ հայրենիքի նկատմամբ ունեցած նախանձախնդրութեանը մասին խօսած ժամանակ խնչեց՝ «Տէր կեցո դու զՀայս»-ը կատարողութեամբ Տիկ. Կարինէ Մուրատեանի, Նրա Հայ գիրի, գրքի ու գրականութեան մասին ունեցած պաշտամունքի հասնող սիրոյն մասին յայտարարւած ժամանակ հնչեց՝ «Հայոց Տառեր»-ը, կատարողութեամբ Պրն. Էդիկ Թամրազեանի։ Սրբազան Հօրը ամբողջական Հայաստան ամբողջական հայութեամբ տեսիլքի, հաւատի ու համոզումի մասին բարձրածայնւած ժամանակ հնչեց «Ուխտ Արարատի» բանաստեղծութիւնը, պրն. Արտոյտ զօհրապեանի կատարողութեամբ, իսկ նրա անսակարկ եւ անշահախնդիր 50-ամեայ զոհողութեան մասին խօսած ժամանակ՝ արտասանւեց «Հաշուեյարդար»-ը, կատարողութեամբ Տիկ. Արփի Ալահվերտեանի, ապա նրա ճշմարիտ եւ տիպար Աստծու, եկեղեցու, ազգի, հայրենիքի ու ժողովրդի ծառայի կերպարի մասին, որ իր արածների համար ամաչելի ոչ մի բան չունի, խօսած ընթացքին, նրան հակադրելով այն անձանց, որոնց կեանքը նմանւում է ծաղիկի, որոնք գալիս են ու անհետ կորում, բայց ինք մնում է ու շարունակում իբրեւ կոչւած ու ընտրեալ եւ բարեգործ, հնչեց «Որպէս մի ծաղիկ հողից դուրս ելայ» կատարողութեամբ Արժ. Տ. Սարգիս քհնյ. Խոսրովեանի։ Գրեթէ բոլոր երգերին դաշնամուրի կատարողութեամբ ընկերակցում էր պարոն Արին Աւանէսեանը։ Իսկ աւարտին, որպէս երախտագիտութիւն նրա 50-ամեայ Հոգեւոր հայրութեան ու ծառայութեան, Տիկ. Այրինա Նորաւեան յուզումնախառն ու հոգեցունց կերպով ասմունքեց Մակար Եպս. Աշգարեանի գրած եւ այդ առիթով Սրբազան Հօրը նւիրած՝ «Յոբելեար Հայր, օրհնի՜ր, օրհնի՜ր» բանաստեղծութիւնը։ Իսկ որպէս ձեռնարկի պսակում՝ Էլպիս Ֆերահեանի մանկապարտէզի սաներից երեք բալիկներ ելոյթ ունեցան եւ իրենց շնորհակալութիւնը, սէրն ու երախտագիտութիւնը յայտնեցին Սրբազան Հօրը։

Ձեռնարկի աւարտին Մակար եպս. Աշգարեան շնորհակալութիւն յայտնեց բոլոր ներկաներին, հրաւէրին ընդառաջելու համար, գնահատեց եւ շնորհակալութիւն յայտնեց նաեւ գեղարւեստական յայտագրին իրենց մասնակցութիւնը բերող անձանց, եւ հրաւիրեց գրքի մեկենասուհի՝ Տիկ. Նինա Աւետեանին, որ իր ձեռքով Սրբազան Հօրը յանձնի նրան ձօնւած գիրքը, ով Աւետեան ընտաիքի կողմից նաեւ մի շատ գեղեցիկ արւեստի ձեռագործ արծաթապատ ու ոսկեայ շրջանակ նւիրեց սրբազան Հօրը։ Այդ առիթով նաեւ Կրօնական Խորհուրդը Սրբազան Հօրը նւիրեց մի շատ գեղեցիկ արծաթեայ խաչանիշ փորագրեալ յուշապնակ։ Ապա Առաջնորդ Սրբազան Հայրը իր սրտի խօսքը փոխանցեց ներկաներին, անդրադառնալով հոգեւորականի իսկ կոչումին, ծառայական գիտակցութեան ու նախանձախնդրութեան, եւ յատկապէս հայրենիքի, ազգի, Եկեղեցու, հոգեւոր ու ազգային արժէքների կառչւածութիւնն է, որ իրեն մղել է իր ամբողջ կեանքում իր ծառայութիւնը անշահախդրօրէն եւ ամենայն խոնարհութեամբ մատուցելու։ Վերջում, եկեղեցու շրջափակում տեղի ունեցաւ ճոխ հիւրասիրութիւն, թորթի կտրումով հանդերձ, որը փոխան ծաղկեպսակի Թեհրանի եկեղեցիների եկեղեցական խորհուրդների կողմից այդ առիթով Սրբազան Հօրը նւէրն էր։

Այս ուրախ առիթով փոխան ծաղկեկողովի եղան նաեւ բազմաթիւ նւիրատւութիւններ, եկեղեցու բարեզարդման ի խնդիր, որոնց յայտնում ենք մեր շնորհակալութիւնն ու օրհնութիւնը։

Թ.Հ.Թ. Կրօնական Խորհուրդ
Լուսանկաները՝ Ժուաննա և Ժենիա Աւետեաններից

ՏՕՆԵՐ

Կրօնական Տօների Օրացոյց


Երկուշաբթի 25 Մարտի 2024;
Աւագ երկուշաբթի

Երեքշաբթի 26 Մարտի 2024;
Աւագ երեքշաբթի

Չորեքշաբթի 27 Մարտի 2024;
Աւագ չորեքշաբթի

Հինգշաբթի 28 Մարտի 2024;
Աւագ հինգշաբթի

Ուրբաթ 29 Մարտի 2024;
Աւագ ուրբաթ

Շաբաթ 30 Մարտի 2024;
Ճրագալոյց

Կիրակի 31 Մարտի 2024;
Սուրբ Յարութիւն կամ Զատիկ

Կիրակի 07 Ապրիլի 2024;
Կրկնազատիկ եւ Աւետումն Սուրբ Կոյս Մարիամ Աստւածածնի

Կիրակի 14 Ապրիլի 2024;
Կանաչ կամ Աշխարհամատրան Կիրակի

Կիրակի 28 Ապրիլի 2024;
Սուրբ Խաչի Երեւման Տօն

Հայկական անձնանուններ

Հայ ազգի արժանիքներին լաւածանօթ և նրա արժէքներով հպարտ հայ ծնողի համար մեծ նշանակութիւն ունի իր գալիք սերնդի հայապահպանման գործընթացը, մասնաւորաբար սփիւռքեան պայմաններում:
Ուստի, այս ուղղութեամբ նորամանկան սպասող ընտանիքներին օժանդակելու նպատակով է, որ օգտւելով հայկական եւ եւրոպական տարբեր աղբիւրներից, Թեհրանի Ազգային Առաջնորդարանի կայքէջի վրայ է տեղադրւում Հայկական անձնանունների ցանկը:

ՀԱՅԿԱԿԱՆ ԱՆՁՆԱՆՈՒՆՆԵՐ