«ԱԼԻՔ» - Ամանորի եւ Ս. Ծննդեան տօների առիթով Իրանի աշխատանքի եւ սոցապահովութեան նախարար՝ դոկտ. Ալի Ռաբիին, նախարարի օգնական եւ Բարեկեցութեան կազմակերպութեան նախագահ դոկտ. Մոհսէն Բանդփէյը եւ նրանց ընկերակցող պատւիրակութիւնը, յունւարի 1-ի երեկոյեան այցելեց «Սօսէ Մայրիկ» հանգստեան տուն:

Ջերմ մթնոլորտում կայացած հանդիպմանը, ուր ներկայ էին Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Կարէն Խանլարեանը, Թ. Հ. Թ. Թեմական խորհրդի անդամ Նւարդ Քեշիշեանը, եւ Տ. Արիստակէս քհնյ. Շահմիրեանը, հիւրերը այցելեցին հանգստեան տանը բնակւող տարեցներին: Նախարարը մէկ առ մէկ զրուցեց տարեցների հետ, այնուհետեւ կենտրոնական դահլիճում կազմակերպւել էր ընդունելութիւն, որը մեկնարկեց քհնյ. հօր կողմից Տէրունական աղօթքով: Ապա նախարարին եւ հիւրերին ողջոյնի խօսք ասաց Թեհրանի Հայ կանանց Բարեգործական ընկերութեան վարչութեան նախագահ Անահիտ Զարգարեանը: Նա հակիրճ ներկայացրեց ընկերութեան պատմական անցեալը ու ծաւալած աշխատանքները, բացատրութիւններ ներկայացնելով ընկերութեան վերահսկողութեան տակ գտնւող եւկու հանգստեան տներ՝ Ս. Գէորգ եկեղեցու շրջափակի եւ «Սօսէ Մայրիկ»-ի մասին: Նա նաեւ անդրադարձաւ առկայ խնդիրներին ու ղեկավարման դժւարութիւններին, եւ տարեցներին խնամելու ուղղութեամբ տարւող աշխատանքներին:

Հանդիպման ընթացքում, նախարարը կառավարութեան անունից շնորհաւորելով Ամանորը՝ անդրադարձաւ Իրանում կրօնական ու ազգային բոլոր փոքրամասնութիւնների խաղաղ գոյակցութեանը եւ կարեւորութեամբ խօսեց Իրանի Իսլամական յեղափոխութեան եւ Իրան-Իրաք 8-ամեայ պարտադրեալ պատերազմի տարիներին իրանահայութեան կողմից դրսեւորւած անձնազոհութիւնների մաս: Նա աւելացրեց, քանի որ երկրի վերիվայրումների ժամանակ բոլորս միմեանց հետ ենք, ուստի անհրաժեշտ է, որ տօն օրերին եւս լինենք միմեանց կողքին, մանաւանդ՝ յարգելով տարեցներին: Տօնախմբութեան ընթացքում հայերէն եւ պարսկերէն երգերով ելոյթ ունեցաւ Զօրիկ Ֆարհադեանը: