Երեքշաբթի դեկտեմբերի 19-ի երեկոյեան, Իսլամական Ազատ Համալսարանի, Թեհրանի Կենտրոն Միաւորի (دانشگاه آزاد اسلامی واحد تهران مرکزی) դահլիճում կայացաւ քննարկում հայ պատմագիրներ՝ Ագաթանգեղոսի, Մովսես Խորենացու, Փաւստոս Բիւզանդի և Սեբէոսի աշխատութիւնների նշանակութիւնը «Իրանի հին պատմութեան մէջ» թեմայով:

Սոյն ծրագրում, որը տեղի ունեցաւ նոյն համալսարանի Հումանիտար Ֆակուլտետի «Ֆերդոսի» սրահում, ելոյթ ունեցաւ համալսարանի դասախօս՝ դոկտ. Միրզա Մոհամմադ Հասանին, որը օգտւելով Գէորգի Նալբանդեանի և Գարուն Սարգսեանի թարգմանութիւններից և այլ աղբիւրներից, պարսկերէն լեզւով ներկայացրեց վերոյիշեալ հայ պատմիչների աշխատութիւնները, կարևորելով նրանցում տեղ գտած տեղեկութիւնները, Իրանի հին պատմութեան համար:

Ծրագրի վերջում եղան հարցումներ, որոնց պատասխանեց օրւայ բանախօսը:

Ծրագրում ներկայ էին նոյն համալսարանի դասախօսներ, ուսանողներ և մի քանի թեհրանահայեր:

Լուրը տրամադրեց պրն. Գասպար Ամիրխանեանը