Երեքշաբթի 15 օգոստոս 2017-ի առաւօտեան, թեմիս առաջնորդ Գերշ. Տ. Սեպուհ Ս. Արք. Սարգսեանին այցելեցին Իրանի Իսլամական Հանրապետութեան Գիտութեան եւ Ուսումնասիրութեան նախարարութեան հումանիտար գիտութիւնների հետազոտական մասնաբաժնի «Իմամ Ալիի կեանքի» ուսումնասիրութեան տնօրէն մարմինը, Սրբազան հօր հրաւիրելու համար «Իմամ Ալիի կեանքի եւ գործունէութեան» միջազգային համագումարին, որը տեղի է ունենալու թւականիս սեպտեմբերի 6-ին։
Սրբազան հայրը գնահատելով յիշեալ կենտրոնի աշխատանքները, կարեւորեց տարբեր կրօնների եւ ազգերի միջեւ հոգեւոր եւ կրօնագիտական անշահախնդիր ու ոչ քարոզչական կենտրոնների առկայութիւնը, որոնք նպաստում են կրօնների երկխօսութեան ու համագործակցութեան ընդլայնման, դառնալով փոխադարձ հասկացողութեան եւ սիրոյ ռահւիրաներ։