Առաջնորդ Սրբազանը ընդունում է Թեմիս Պատգամաւորական Ժողովի Դիւանին

Հինգշաբթի 3 օգոստոս 2017-ի առաւօտեան Թեմիս Առաջնորդ.Գերշ.Տ. Սեպուհ Արք. Սարգսեան Առաջնորդարանի իր գրասենեակում ընդունեց Թեմիս Պատգամաւորական Ժողովի Դիւանը։

Սրբազան Հայրը ջերմօրէն ողջունեց դիւանին, գնահատեց իր յարատեւ եւ հետեւողական աշխատանքը եւ իրեն փոխանցեց նախորդ օրւայ Թեմական եւ Կրթական Խորհրդների հետ ունեցած հանդիպման արդիւնքում դպրոցների կրթական մակարդակի հետ կապւած հարցերի քննարկման արդիւնքը։

Սրբազան հայրը կարեւորութեամբ յայտնեց, որ մենք ամէն ջանք պէտք է թափենք ոչ միայն մեր դպրոցներում միջնակարգ օղակները պահելու այլեւ ամէն հնարաւոր միջոցի պիտի դիմենք մեր դպրոցների բոլոր օղակների մակարդակը բարձրացնել ապահովելով բարձրորակ ուսուցիչներ։

«Մեր առաջնահերթութիւնը, ասաց Սրբազան Հայրը, մեր աշակերտութեան թիւի  ապահովումն  ու լաւագոյն ուսուցիչներով դպրոցները ապահովելն է»։ Դիւանը իր գոհունակութիւնը յայտնեց եւ խնդրեց որ թելադրւի   թեմական եւ կրթական խորհրդների դպրոցների գծով ժողովրդական հանդիպումները կազմակերպել որպէսզի անհրաժեշտ տւեալներով ձեռք-ձեռքի տւած  կարողանանք դրական շօշափելի արդիւնքի հասնել։

Հանդիպման աւարտին կարեւորութեամբ շեշտւեց  կազմակերպումը հանդիպումների դպրոցների տեսուչ, փոխ տեսուչ եւ ծնողական խորհուրդների հետ նրանց յայտնելու համար մեր մտահոգութիւնները եւ հրաւիրելով համատեղ աշխատանքով կանգուն ու ամուր պահելու մեր դպրոցները իրենց բոլոր օղակներով։